బెంగళూరులో 'బొద్దు కుక్క' కోసం పోటీ: విజేత ఎవరో తేల్చేది ఓటర్లే!

బెంగళూరులో ప్రస్తుతం ఒక వినూత్న పోటీ సందడి చేస్తోంది. ఇక్కడ రాజకీయ నాయకులు, మేనిఫెస్టోలు లేదా టీవీ చర్చలు లేవు. అయినప్పటికీ, ప్రచారం మాత్రం జోరుగా సాగుతోంది. ఈ ఎన్నికల్లో పోటీ చేసే అభ్యర్థులకు నాలుగు కాళ్లు, ఊగే తోక, బొద్దుగా ఉండే శరీరం ఉండటమే ఇందుకు కారణం. బెంగళూరు నగరం తన "అత్యంత బొద్దు కుక్క"ను ఎన్నుకునేందుకు సిద్ధమవుతోంది. ఆసక్తికరంగా సాగుతున్న ఈ పోటీ ప్రస్తుతం తుది అంకానికి చేరుకుంది.

'ఫ్యాట్ డాగ్స్ ఆఫ్ బీఎల్‌ఆర్' పేరుతో అక్టోబర్ 1వ తేదీన ఈ వినూత్న పోటీ ప్రారంభమైంది. నగరంలోని అత్యంత లావుగా ఉండే కుక్కకు కిరీటం కట్టడమే ఈ పోటీ ప్రధాన ఉద్దేశం. మొత్తం 64 కుక్కలు ఈ టైటిల్ కోసం తలపడగా, పలు నాకౌట్ రౌండ్లు, ఆన్‌లైన్ ప్రచారాల అనంతరం ఇప్పుడు రెండు కుక్కలు మాత్రమే తుది పోరులో నిలిచాయి.

ఈ టోర్నమెంట్‌ను నాకౌట్ పద్ధతిలో నిర్వహిస్తుండగా, మద్దతుదారులు తమకు ఇష్టమైన శునకాలకు ఆన్‌లైన్‌ వేదికగా ఓటు వేస్తున్నారు. పోటీ కోసం ప్రత్యేకంగా ప్రచార పోస్టర్లను రూపొందించడం, ఓట్ల కోసం విజ్ఞప్తి చేయడం వంటి అంశాలు అచ్చం సాధారణ ఎన్నికల వాతావరణాన్ని తలపిస్తున్నాయి. అయితే, తమకు ఇంతటి ఆదరణ లభిస్తోందన్న విషయం పోటీలో ఉన్న ఆ మూగజీవాలకు మాత్రం తెలిసి ఉండకపోవచ్చు.

ఇలాంటి వైవిధ్యమైన పోటీ నిర్వహణ బెంగళూరు నగరంలోనే మొదటిసారి కాదు. గతంలో ఢిల్లీలోనూ 'ఫ్యాట్ డాగ్స్ ఆఫ్ ఢిల్లీ' పేరుతో నిర్వహించిన పోటీ సామాజిక మాధ్యమాల్లో వైరల్ అయింది. నేషనల్ క్యాపిటల్ రీజియన్‌ పరిధిలోని 64 శునకాలు ఆనాడు పోటీ పడ్డాయి. ఈ పోటీ ద్వారా వీధి కుక్కలు సైతం సోషల్ మీడియా సెలబ్రిటీలుగా మారాయి. తమ అభిమాన శునకాల కోసం ఇన్‌స్టాగ్రామ్‌లో విస్తృతంగా ప్రచారం కూడా సాగింది. ఆ పోటీలో సాకేత్‌కు చెందిన 46 కిలోల గూగూ, యూసుఫ్ సరాయ్‌కు చెందిన చాంకీ (రాంబాబు) వంటి కుక్కలు విశేష ప్రజాదరణ పొందాయి.

అలస్కాలో ఏటా నిర్వహించే 'ఫ్యాట్ బేర్ వీక్' ఈ పోటీలకు స్ఫూర్తిగా నిలిచింది. శీతాకాలం కోసం శరీరంలో కొవ్వును నిల్వ చేసుకునే ఎలుగుబంట్ల మధ్య అక్కడ ఇలాంటి పోటీని నిర్వహిస్తారు. అదే తరహాలో మన నగరాల్లోని వీధి కుక్కలను కూడా భాగస్వామ్యం చేస్తూ, సోషల్ మీడియా ప్రచారంతో దీనికి సరికొత్త హంగులు అద్దారు.

బెంగళూరులో నిర్వహిస్తున్న ఈ కార్యక్రమాన్ని చార్లీస్ యానిమల్ రెస్క్యూ సెంటర్ (కేర్), యూపీఐ పేమెంట్స్ యాప్ 'ఫేవ్', ఏఐ సాఫ్ట్‌వేర్ ప్లాట్‌ఫామ్ 'ఎమర్జెంట్' సంయుక్తంగా చేపడుతున్నాయి. మూగజీవాలపై ఉన్న ప్రేమతో ప్రజలను, సమాజాన్ని ఏకం చేయడమే ఈ పోటీ ప్రధాన లక్ష్యమని నిర్వాహకులు పేర్కొంటున్నారు.